مکمل شاعری
وصل کی شب بھی خفا وہ بت مغرور رہا
حوصلہ دل کا جو تھا دل میں بدستور رہا
جمع کس دن نہ ہوئے موسم گل میں میکش
روز ہنگامہ تہ سایۂ انگور رہا
عمر رفتہ کے تلف ہونے کا آیا تو خیال
لیکن اک دم کی تلافی کا نہ مقدور رہا
جلوۂ برق تجلی نظر آیا نہ کبھی
مدتوں جا کے وہاں میں شجر طور رہا
راست بازی کر اگر ناموری ہے درکار
دار سے خلق میں آوازۂ منصور رہا
گردش بخت کہاں سے ہمیں لائی ہے کہاں
منزلوں وادئ غربت سے وطن دور رہا
غول صحرا نے مرا ساتھ نہ چھوڑا شب بھر
لے کے مشعل کبھی نزدیک کبھی دور رہا
ہم بھی موجود تھے کل محفل جاناں میں امیرؔ
رات کو دیر تلک آپ کا مذکور رہا
وہ تو ہے چرخ چہارم پہ یہ پچ محلے پر
سچ ہے عیسیٰ سے بھی بالا ترا مزدور رہا
زلف و رخ دونوں ہیں جانے سے جوانی کے خراب
مشک وہ مشک نہ کافور وہ کافور رہا
فصل گل آئی گئی صحن چمن میں سو بار
اپنے سر میں تھا جو سودا وہ بدستور رہا
— امیر مینائی