مکمل شاعری

چل کے اب سو رہو باتیں نہ بناؤ صاحب

وصل کی شب ہے نہیں حرف حکایات کی رات

ذرے افشاں کے نہیں کرمک شب تاب سے کم

ہے وہ زلف عرق آلود کہ برسات کی رات

بات کرنے میں تو جاتی ہے ملاقات کی رات

کیا بری بات ہے رہ جاؤ یہیں رات کی رات

وصل چاہا شب معراج تو یہ عذر کیا

ہے یہ اللہ و پیمبر کی ملاقات کی رات

لیلۃ القدر ہے وصلت کی دعا مانگ امیرؔ

اس سے بہتر ہے کہاں کوئی مناجات کی رات

زاہد اس زلف میں پھنس جائے تو اتنا پوچھوں

کہیے کس طرح کٹی قبلۂ حاجات کی رات

ہم مسافر ہیں یہ دنیا ہے حقیقت میں سرا

ہے توقف ہمیں اس جا تو فقط رات کی رات

شام سے صبح تلک چلتے ہیں جام مے عیش

خوب ہوتی ہے بسر اہل خرابات کی رات

— امیر مینائی