مکمل شاعری
ہم جو مست شراب ہوتے ہیں
ذرے سے آفتاب ہوتے ہیں
ہم جو کرتے ہیں مے کدے میں دعا
اہل مسجد کو خواب ہوتے ہیں
ہے خرابات صحبت واعظ
لوگ ناحق خراب ہوتے ہیں
بادشہ ہیں گدا، گدا سلطان
کچھ نئے انقلاب ہوتے ہیں
کہتے ہیں مست رند سودائی
خوب ہم کو خطاب ہوتے ہیں
وہی رہ جاتے ہیں زبانوں پر
شعر جو انتخاب ہوتے ہیں
کیا کہیں کیسے روز و شب ہم سے
عمل ناثواب ہوتے ہیں
آنسوؤں سے امیرؔ ہیں رسوا
ایسے لڑکے عذاب ہوتے ہیں
— امیر مینائی