مکمل شاعری

رو کے اس شوخ سے قاصد مرا رونا کہنا

ہنس پڑے اس پہ تو پھر حرف تمنا کہنا

صاف کہتے ہو مگر کچھ نہیں کھلتا کہنا

بات کہنا بھی تمہارا ہے معما کہنا

ہر بن موئے مژہ میں ہیں یہاں سو طوفاں

عین غفلت ہے مری آنکھ کو دریا کہنا

مثل مکتوب نہ کہنے میں ہے کیا کیا کہنا

نہ مری طرز خموشی نہ کسی کا کہنا

کر لیا عہد کبھی کچھ نہ کہیں گے منہ سے

اب اگر سچ بھی کہیں تم ہمیں جھوٹا کہنا

اور تھوڑی سی شب وصل بڑھا دے یارب

صبح نزدیک ہمیں ان سے ہے کیا کیا کہنا

لا سکو گے نہ ذرا جلوۂ دیدار کی تاب

ارنی منہ سے نہ اے حضرت موسیٰ کہنا

خاک میں ضد سے ملاؤ نہ مرے آنسو کو

سچے موتی کو مناسب نہیں جھوٹا کہنا

پڑھتے ہیں دیکھ کے اس بت کو فرشتے بھی درود

مرحبا صل علیٰ صل علیٰ کیا کہنا

پھاڑ کھاتا ہے جو غیروں کو جھپٹ کر سگ یار

میں یہ کہتا ہوں مرے شیر ترا کیا کہنا

کیسے ناداں ہیں جو اچھوں کو برا کہتے ہیں

ہو برا بھی تو اسے چاہئے اچھا کہنا

وصف رخ میں جو سنے شعر وہ ہنس کر بولے

شعر ہیں نور کے ہے نور کا تیرا کہنا

ان حسینوں کی جو تعریف کرو چڑھتے ہیں

سچ تو یہ ہے کہ برا ہے انہیں اچھا کہنا

گھٹتے گھٹتے میں رہا عشق کمر میں آدھا

جامۂ تن کو مرے چاہئے نیما کہنا

اے بتو تم جو ادا آ کے کرو مسجد میں

لب محراب کہے نام خدا کیا کہنا

دم آخر تو بتو یاد خدا کرنے دو

زندگی بھر تو کیا میں نے تمہارا کہنا

شوق کعبے لیے جاتا ہے ہوس جانب دیر

میرے اللہ بجا لاؤں میں کس کا کہنا

ساری محفل کو اشاروں میں لٹا دو اے جان

سیکھ لو چشم سخن گو سے لطیفہ کہنا

چستیٔ طبع سے استاد کا ہے قول امیرؔ

ہو زمیں سست مگر چاہئے اچھا کہنا

میں تو آنکھوں سے بجا لاتا ہوں ارشاد حضور

آپ سنتے نہیں کانوں سے بھی میرا کہنا

— امیر مینائی