مکمل شاعری

مرے بس میں یا تو یارب وہ ستم شعار ہوتا

یہ نہ تھا تو کاش دل پر مجھے اختیار ہوتا

ترا مے کدہ سلامت ترے خم کی خیر ساقی

مرا نشہ کیوں اترتا مجھے کیوں خمار ہوتا

نہیں پوچھتا ہے مجھ کو کوئی پھول اس چمن میں

دل داغدار ہوتا تو گلے کا ہار ہوتا

پس مرگ کاش یوں ہی مجھے وصل یار ہوتا

وہ سر مزار ہوتا میں تہہ مزار ہوتا

میں ہوں نامراد ایسا کہ بلک کے یاس روتی

کہیں پا کے آسرا کچھ جو امیدوار ہوتا

جو نگاہ کی تھی ظالم تو پھر آنکھ کیوں چرائی

وہی تیر کیوں نہ مارا جو جگر کے پار ہوتا

میں زباں سے تم کو سچا کہو لاکھ بار کہہ دوں

اسے کیا کروں کہ دل کو نہیں اعتبار ہوتا

وہ مزا دیا تڑپ نے کہ یہ آرزو ہے یارب

مرے دونوں پہلوؤں میں دل بے قرار ہوتا

نہ ملک سوال کرتے نہ لحد فشار دیتی

سر راہ کوئے قاتل جو مرا مزار ہوتا

دم نزع بھی جو وہ بت مجھے آ کے منہ دکھاتا

تو خدا کے منہ سے اتنا نہ میں شرمسار ہوتا

مری خاک بھی لحد میں نہ رہی امیرؔ باقی

انہیں مرنے ہی کا اب تک نہیں اعتبار ہوتا

— امیر مینائی