مکمل شاعری

برابر آئنے کے بھی نہ سمجھے قدر وہ دل کی

اسے زیر قدم رکھا اسے پیش نظر رکھا

مٹائے دیدہ و دل دونوں میرے اشک خونیں نے

عجب یہ طفل ابتر تھا نہ گھر رکھا نہ در رکھا

فراق یار نے بے چین مجھ کو رات بھر رکھا

کبھی تکیہ ادھر رکھا کبھی تکیہ ادھر رکھا

شکست دل کا باقی ہم نے غربت میں اثر رکھا

لکھا اہل وطن کو خط تو اک گوشہ کتر رکھا

جناں میں ساتھ اپنے کیوں نہ لے جاؤں گا ناصح کو

سلوک ایسا ہی میرے ساتھ ہے حضرت نے کر رکھا

ترے ہر نقش پا کو رہ گزر میں سجدہ گہ سمجھے

جہاں تو نے قدم رکھا وہاں میں نے بھی سر رکھا

نہ کی کس نے سفارش میری وقت قتل قاتل سے

کماں نے ہاتھ جوڑے تیغ نے قدموں پہ سر رکھا

زمیں میں دانۂ گندم صدف میں ہم ہوے گوہر

ہمارے عجز نے ہر معرکہ میں ہم کو در رکھا

تمہارے سنگ در کا ایک ٹکڑا بھی جو ہاتھ آیا

عزیز ایسا کیا مر کر اسے چھاتی پہ دھر رکھا

بڑا احساں ہے میرے سر پہ اس کی لغزش پا کا

کہ اس نے بے تحاشا ہاتھ میرے دوش پر رکھا

امیر اچھا شگون مے کیا ساقی کی فرقت میں

جو برسا ابر رحمت جائے مے شیشوں میں بھر رکھا

غضب برسے وہ میرے آتے ہی معلوم ہوتا ہے

جگہ خالی جو پائی یار کو غیروں نے بھر رکھا

— امیر مینائی