مکمل شاعری

کون ویرانے میں دیکھے گا بہار

پھول جنگل میں کھلے کن کے لیے

باغباں کلیاں ہوں ہلکے رنگ کی

بھیجنی ہے ایک کمسن کے لیے

ہے جوانی خود جوانی کا سنگار

سادگی گہنہ ہے اس سن کے لیے

ساری دنیا کے ہیں وہ میرے سوا

میں نے دنیا چھوڑ دی جن کے لیے

جب سے بلبل تو نے دو تنکے لیے

ٹوٹتی ہیں بجلیاں ان کے لیے

صبح کا سونا جو ہاتھ آتا امیرؔ

بھیجتے تحفہ موذن کے لیے

وصل کا دن اور اتنا مختصر

دن گنے جاتے تھے اس دن کے لیے

سب حسیں ہیں زاہدوں کو ناپسند

اب کوئی حور آئے گی ان کے لیے

— امیر مینائی