مکمل شاعری

بعد مرنے کے بھی چھوڑی نہ رفاقت میری

میری تربت سے لگی بیٹھی ہے حسرت میری

ہنس کے فرماتے ہیں وہ دیکھ کے حالت میری

کیوں تم آسان سمجھتے تھے محبت میری

یار پہلو میں ہے تنہائی ہے کہہ دو نکلے

آج کیوں دل میں چھپی بیٹھی ہے حسرت میری

آئینہ صبح شب وصل جو دیکھا تو کہا

دیکھ ظالم یہ تھی شام کو صورت میری

کس ڈھٹائی سے وہ دل چھین کے کہتے ہیں امیرؔ

وہ مرا گھر ہے رہے جس میں محبت میری

حسن اور عشق ہم آغوش نظر آ جاتے

تیری تصویر میں کھنچ جاتی جو حیرت میری

میں نے آغوش تصور میں بھی کھینچا تو کہا

پس گئی پس گئی بے درد نزاکت میری

— امیر مینائی