مکمل شاعری

یہ مدرسہ یہ جواں یہ سرور و رعنائی

انہیں کے دم سے ہے مے خانۂ فرنگ آباد

خرید سکتے ہیں دنیا میں عشرت پرویز

خدا کی دین ہے سرمایۂ غم فرہاد

کریں گے اہل نظر تازہ بستیاں آباد

مری نگاہ نہیں سوئے کوفہ و بغداد

فقیہ شہر کی تحقیر کیا مجال مری

مگر یہ بات کہ میں ڈھونڈتا ہوں دل کی کشاد

کئے ہیں فاش رموز قلندری میں نے

کہ فکر مدرسہ و خانقاہ ہو آزاد

رشی کے فاقوں سے ٹوٹا نہ برہمن کا طلسم

عصا نہ ہو تو کلیمی ہے کار بے بنیاد

نہ فلسفی سے نہ ملا سے ہے غرض مجھ کو

یہ دل کی موت وہ اندیشہ و نظر کا فساد

— علامہ اقبال