مکمل شاعری

خودی ہو علم سے محکم تو غیرت جبریل

اگر ہو عشق سے محکم تو صور اسرافیل

نظر نہیں تو مرے حلقۂ سخن میں نہ بیٹھ

کہ نکتہ ہائے خودی ہیں مثال تیغ اصیل

مجھے وہ درس فرنگ آج یاد آتے ہیں

کہاں حضور کی لذت کہاں حجاب دلیل

عذاب دانش حاضر سے با خبر ہوں میں

کہ میں اس آگ میں ڈالا گیا ہوں مثل خلیل

اندھیری شب ہے جدا اپنے قافلے سے ہے تو

ترے لیے ہے مرا شعلۂ نوا قندیل

فریب خوردۂ منزل ہے کارواں ورنہ

زیادہ راحت منزل سے ہے نشاط رحیل

غریب و سادہ و رنگیں ہے داستان حرم

نہایت اس کی حسین ابتدا ہے اسماعیل

— علامہ اقبال