مکمل شاعری

یا رب یہ جہان گزراں خوب ہے لیکن

کیوں خوار ہیں مردان صفا کیش و ہنر مند

تو برگ گیا ہے نہ وہی اہل خرد را

او کشت گل و لالہ بہ بخشد بہ خرے چند

حاضر ہیں کلیسا میں کباب و مئے گلگوں

مسجد میں دھرا کیا ہے بجز موعظہ و پند

احکام ترے حق ہیں مگر اپنے مفسر

تاویل سے قرآں کو بنا سکتے ہیں پازند

فطرت نے مجھے بخشے ہیں جوہر ملکوتی

خاکی ہوں مگر خاک سے رکھتا نہیں پیوند

گو اس کی خدائی میں مہاجن کا بھی ہے ہاتھ

دنیا تو سمجھتی ہے فرنگی کو خداوند

مدت سے ہے آوارۂ افلاک مرا فکر

کر دے اسے اب چاند کے غاروں میں نظر بند

فردوس جو تیرا ہے کسی نے نہیں دیکھا

افرنگ کا ہر قریہ ہے فردوس کی مانند

اپنے بھی خفا مجھ سے ہیں بیگانے بھی نا خوش

میں زہر ہلاہل کو کبھی کہہ نہ سکا قند

درویش خدا مست نہ شرقی ہے، نہ غربی

گھر میرا نہ دلی نہ صفاہاں نہ سمرقند

کہتا ہوں وہی بات سمجھتا ہوں جسے حق

نے آبلۂ مسجد ہوں نہ تہذیب کا فرزند

پر سوز نظر باز و نکوبین و کم آرزو

آزاد و گرفتار و تہی کیسہ و خورسند

ہوں آتش نمرود کے شعلوں میں بھی خاموش

میں بندۂ مومن ہوں نہیں دانۂ اسپند

مشکل ہے اک بندۂ حق بین و حق اندیش

خاشاک کے تودے کو کہے کوہ دماوند

چپ رہ نہ سکا حضرت یزداں میں بھی اقبالؔ

کرتا کوئی اس بندۂ گستاخ کا منہ بند

ہر حال میں میرا دل بے قید ہے خرم

کیا چھینے گا غنچے سے کوئی ذوق شکرخند

— علامہ اقبال