مکمل شاعری

پریشاں ہو کے میری خاک آخر دل نہ بن جائے

جو مشکل اب ہے یا رب پھر وہی مشکل نہ بن جائے

عروج آدم خاکی سے انجم سہمے جاتے ہیں

کہ یہ ٹوٹا ہوا تارا مہ کامل نہ بن جائے

کہیں اس عالم بے رنگ و بو میں بھی طلب میری

وہی افسانۂ دنبالۂ محمل نہ بن جائے

بنایا عشق نے دریائے ناپیدا کراں مجھ کو

یہ میری خود نگہداری مرا ساحل نہ بن جائے

کبھی چھوڑی ہوئی منزل بھی یاد آتی ہے راہی کو

کھٹک سی ہے جو سینے میں غم منزل نہ بن جائے

نہ کر دیں مجھ کو مجبور نوا فردوس میں حوریں

مرا سوز دروں پھر گرمی محفل نہ بن جائے

— علامہ اقبال