مکمل شاعری
راہیں چمک اٹھیں گی خورشید کی مشعل سے
ہم راہ صبا ہوگی خوشبوئے سحر لے کر
یادوں سے تری روشن محراب شب ہجراں
ڈھونڈھیں گے تجھے کب تک قندیل قمر لے کر
مخمل سی بچھا دیں گے قدموں کے تلے ساحل
دریا ابل آئیں گے صد موج گہر لے کر
افلاک بجائیں گے ساز اپنے ستاروں کا
گائیں گے بہت لمحے انفاس شرر لے کر
پنہائیں گے تاج اپنا پیڑوں کے گھنے سائے
نکلیں گے شجر اپنے خوش رنگ ثمر لے کر
بیٹھے ہیں جہاں ساقی پیمانۂ زر لے کر
اس بزم سے اٹھ آئے ہم دیدۂ تر لے کر
لپکیں گے گلے ملنے سرو اور صنوبر سب
اٹھیں گے گلستاں بھی شاخ گل تر لے کر
ہوتی ہے زمانے میں کس طرح پذیرائی
نکلو تو ذرا گھر سے اک ذوق سفر لے کر
ہنستے ہوئے شہروں کی آواز بلائے گی
لب جام کے چمکیں گے سو شعلۂ تر لے کر
یہ عالم خاکی اک سیارۂ روشن ہے
افلاک سے ٹکرا دو تقدیر بشر لے کر
کیا حسن ہے دنیا میں کیا لطف ہے جینے میں
دیکھے تو کوئی میرا انداز نظر لے کر