مکمل شاعری

خوگر روئے خوش جمال ہیں ہم

ناز پروردۂ وصال ہیں ہم

رنگ ہی رنگ خوشبو ہی خوشبو

گردش ساغر خیال ہیں ہم

ہم کو یوں رائیگاں نہ کر دینا

حاصل فصل ماہ و سال ہیں ہم

رونق کاروبار ہستی ہیں

ہم نے مانا شکستہ حال ہیں ہم

ایسے دیوانے پھر نہ آئیں گے

دیکھ لو ہم کو بے مثال ہیں ہم

مال و زر، مال و زر کی قیمت کیا

صاحب دولت کمال ہیں ہم

کس کی رعنائی خیال ہے تو

تیری رعنائی جمال ہیں ہم

دولت حسن لا زوال ہے تو

دولت عشق لا زوال ہیں ہم

— علی سردار جعفری