مکمل شاعری

دل کی آگ جوانی کے رخساروں کو دہکائے ہے

بہے پسینہ مکھڑے پر یا سورج پگھلا جائے ہے

من اک ننھا سا بالک ہے ہمک ہمک رہ جائے ہے

دور سے مکھ کا چاند دکھا کر کون اسے للچائے ہے

تیرے قامت کی لرزش سے موج مے میں لرزش ہے

تیری نگہ کی مستی ہی پیمانوں کو چھلکائے ہے

مے ہے تیری آنکھوں میں اور مجھ پہ نشہ سا طاری ہے

نیند ہے تیری پلکوں میں اور خواب مجھے دکھلائے ہے

تیرا درد سلامت ہے تو مرنے کی امید نہیں

لاکھ دکھی ہو یہ دنیا رہنے کی جگہ بن جائے ہے

— علی سردار جعفری