مکمل شاعری
مستیٔ رندانہ ہم سیرابیٔ مے خانہ ہم
گردش تقدیر سے ہیں گردش پیمانہ ہم
راہ میں فوجوں کے پہرے سر پہ تلواروں کی چھاؤں
آئے ہیں زنداں میں بھی با شوکت شاہانہ ہم
خون دل سے چشم تر تک چشم تر سے تا بہ خاک
کر گئے آخر گل و گلزار ہر ویرانہ ہم
مٹتے مٹتے دے گئے ہم زندگی کو رنگ و نور
رفتہ رفتہ بن گئے اس عہد کا افسانہ ہم
قید ہو کر اور بھی زنداں میں اڑتا ہے خیال
رقص زنجیروں میں بھی کرتے ہیں آزادانہ ہم
کیا بلا جبر اسیری ہے کہ آزادی میں بھی
دوش پر اپنے لیے پھرتے ہیں زنداں خانہ ہم
یا جگا دیتے ہیں ذروں کے دلوں میں مے کدے
یا بنا لیتے ہیں مہر و ماہ کو پیمانہ ہم
— علی سردار جعفری