مکمل شاعری

اک صبح ہے جو ہوئی نہیں ہے

اک رات ہے جو کٹی نہیں ہے

مقتولوں کا قحط پڑ نہ جائے

قاتل کی کہیں کمی نہیں ہے

ویرانوں سے آ رہی ہے آواز

تخلیق جنوں رکی نہیں ہے

ساقی سے جو جام لے نہ بڑھ کر

وہ تشنگی تشنگی نہیں ہے

اک دھوپ سی ہے جو زیر مژگاں

وہ آنکھ ابھی اٹھی نہیں ہے

ہے اور ہی کاروبار مستی

جی لینا تو زندگی نہیں ہے

دل میں جو جلائی تھی کسی نے

وہ شمع طرب بجھی نہیں ہے

بھوکوں کی نگاہ میں ہے بجلی

یہ برق ابھی گری نہیں ہے

عاشق کشی و فریب کاری

یہ شیوۂ دلبری نہیں ہے

ہیں کام بہت ابھی کہ دنیا

شائستۂ آدمی نہیں ہے

ہر رنگ کے آ چکے ہیں فرعون

لیکن یہ جبیں جھکی نہیں ہے

— علی سردار جعفری