مکمل شاعری
حزیں ہے بیکس و رنجور ہے دل
محبت پر مگر مجبور ہے دل
ترے جلوے کا ہے جس دن سے مسکن
جواب جلوہ گاہ طور ہے دل
کیا ہے یاد اس یاد جہاں نے
الٰہی کس قدر مسرور ہے دل
تمہارے نور سے معمور ہے دل
عجب کیا ہے کہ رشک طور ہے دل
تمہارے عشق سے مسرور ہے دل
ابھی تک مست ہے مخمور ہے دل
دو عالم کو بھلا دیں کیوں نہ اخترؔ
کہ اس کی یاد سے معمور ہے دل
بہت چاہا نہ جائیں تیرے در پر
مگر کیا کیجیے مجبور ہے دل
فقیری میں اسے حاصل ہے شاہی
تمہارے عشق پر مغرور ہے دل
— اختر شیرانی