مکمل شاعری

کچھ تجھے بھی ہے خبر او سونے والے ناز سے

میری راتیں لٹ گئیں نیندیں پریشاں ہو گئیں

عمر بھر کم بخت کو پھر نیند آ سکتی نہیں

جس کی آنکھوں پر تری زلفیں پریشاں ہو گئیں

عمر بھر کی تلخ بیداری کا ساماں ہو گئیں

ہائے وہ راتیں کہ جو خواب پریشاں ہو گئیں

بس کرو او میری رونے والی آنکھوں بس کرو

اب تو اپنے ظلم پر وہ بھی پشیماں ہو گئیں

گلشن دل میں کہاں اخترؔ وہ رنگ نو بہار

آرزوئیں چند کلیاں تھیں پریشاں ہو گئیں

آہ وہ دن جو نہ آئے پھر گزر جانے کے بعد

ہائے وہ راتیں کہ جو خواب پریشاں ہو گئیں

ہائے وہ مایوسیوں میں میری امیدوں کا رنگ

جو ستاروں کی طرح اٹھ اٹھ کے پنہاں ہو گئیں

دل کے پردوں میں تھیں جو جو حسرتیں پردہ نشیں

آج وہ آنکھوں میں آنسو بن کے عریاں ہو گئیں

میں فدا اس چاند سے چہرے پہ جس کے نور سے

میرے خوابوں کی فضائیں یوسفستاں ہو گئیں

— اختر شیرانی