مکمل شاعری

کہہ رہی ہے نگاہ دز دیدہ

رخ بدلنے کو ہے زمانے کا

وعدہ اس ماہرو کے آنے کا

یہ نصیبہ سیاہ خانے کا

ذرے ذرے میں بے حجاب ہیں وہ

جن کو دعوی ہے منہ چھپانے کا

چاندنی خامشی اور آخر شب

آ کہ ہے وقت دل لگانے کا

حاصل عمر ہے شباب مگر

اک یہی وقت ہے گنوانے کا

تیری آنکھوں کی ہو نہ ہو تقصیر

نام رسوا شراب خانے کا

رہ گئے بن کے ہم سراپا غم

یہ نتیجہ ہے دل لگانے کا

ہے قیامت ترے شباب کا رنگ

رنگ بدلے گا پھر زمانے کا

اس کی بدلی ہوئی نظر توبہ

یوں بدلتا ہے رخ زمانے کا

دیکھتے ہیں ہمیں وہ چھپ چھپ کر

پردہ رہ جائے منہ چھپانے کا

جس کا ہر لفظ ہے سراپا غم

میں ہوں عنوان اس فسانے کا

کر دیا خوگر ستم اخترؔ

ہم پہ احسان ہے زمانے کا

— اختر شیرانی