مکمل شاعری
آہ وہ اس کی نگاہ مے فروش
جب بھی اٹھی مستیاں برسا گئی
جھوم کر بدلی اٹھی اور چھا گئی
ساری دنیا پر جوانی آ گئی
گیسوئے مشکیں میں وہ روئے حسیں
ابر میں بجلی سی اک لہرا گئی
ساز دل کو گدگدایا عشق نے
موت کو لے کر جوانی آ گئی
پارسائی کی جوانمرگی نہ پوچھ
توبہ کرنی تھی کہ بدلی چھا گئی
عالم مستی کی توبہ الاماں
پارسائی نشہ بن کر چھا گئی
آہ اس کی بے نیازی کی نظر
آرزو کیا پھول سی کمھلا گئی
اخترؔ اس جان تمنا کی ادا
جب کبھی یاد آ گئی تڑپا گئی
— اختر شیرانی