مکمل شاعری

چاک داماں کی قسم چاک گریباں کی قسم

ہنسنے والے تجھے اس حال پریشاں کی قسم

نیند آئے نہ کبھی تجھ سے بچھڑ کر ظالم

اپنی آنکھوں کی قسم تیرے شبستاں کی قسم

آؤ بے پردہ تمہیں جلوۂ پنہاں کی قسم

ہم نہ چھیڑیں گے ہمیں زلف پریشاں کی قسم

آج تک صبح وطن یاد ہے ہم کو اخترؔ

درد ہجراں کی قسم شام غریباں کی قسم

لب جاناں پہ فدا عارض جاناں کے نثار

شام رنگیں کی قسم صبح درخشاں کی قسم

میرے ارمان سے واقف نہیں شرمائیں گے آپ

آپ کیوں کھاتے ہیں ناحق مرے ارماں کی قسم

— اختر شیرانی