مکمل شاعری
ذکر شب وصال ہو کیا قصہ مختصر
جس بات سے وہ ڈرتے تھے وہ بات ہو گئی
اس مہ جبیں سے آج ملاقات ہو گئی
بے درد آسمان یہ کیا بات ہو گئی
جھولا جھلائیں چل کے حسینوں کو باغ میں
گجرات میں سنا ہے کہ برسات ہو گئی
کیا فائدہ اب اخترؔ اگر پارسا بنے
جب ساری عمر نذر خرابات ہو گئی
آوارگان عشق کا مسکن نہ پوچھئے
پڑ رہتے ہیں وہیں پہ جہاں رات ہو گئی
زاہد کو زندگی ہی میں کوثر چکھا دیا
رندوں سے آج یہ بھی کرامات ہو گئی
بے چین رکھنے والے پریشاں ہوں خود نہ کیوں
آخر کو تیری زلف مری رات ہو گئی
مسجد کو ہم چلے گئے مستی میں بھول کر
ہم سے خطا یہ پیر خرابات ہو گئی
پچھلے غموں کا ذکر ہی کیا جب وہ مل گئے
اے آسماں تلافئ مافات ہو گئی
— اختر شیرانی