مکمل شاعری
وہ کبھی مل جائیں تو کیا کیجئے
رات دن صورت کو دیکھا کیجئے
جو تمنا بر نہ آئے عمر بھر
عمر بھر اس کی تمنا کیجئے
چاندنی راتوں میں اک اک پھول کو
بے خودی کہتی ہے سجدہ کیجئے
عشق کی رنگینیوں میں ڈوب کر
چاندنی راتوں میں رویا کیجئے
پوچھ بیٹھے ہیں ہمارا حال وہ
بے خودی تو ہی بتا کیا کیجئے
آپ ہی نے درد دل بخشا ہمیں
آپ ہی اس کا مداوا کیجئے
ہم ہی اس کے عشق کے قابل نہ تھے
کیوں کسی ظالم کا شکوہ کیجئے
کہتے ہیں اخترؔ وہ سن کر میرے شعر
اس طرح ہم کو نہ رسوا کیجئے
— اختر شیرانی