مکمل شاعری

مسمریزم کے عمل میں دہر اب مشغول ہے

مغرب و مشرق میں اک عامل ہے اک معمول ہے

جسم و جاں کیسے کہ عقلوں میں تغیر ہو چلا

تھا جو مکروہ اب پسندیدہ ہے اور مقبول ہے

گلشن ملت میں پامالی سرافرازی ہے اب

جو خزاں دیدہ ہے برگ اپنی نظر میں پھول ہے

مطلع انوار مشرق سے ہے خلقت بے خبر

مستند پرتو وہ ہے مغرب سے جو منقول ہے

کوئی مرکز ہی نہیں پیدا ہو پھر کیوں کر محیط

جھول ہے پیچیدگی ہے ابتری ہے بھول ہے

— اکبر الہ آبادی