مکمل شاعری

ہر تصور ہے مرا عکس جمال روئے دوست

میرا ہر مجموعۂ وہم اک گل خوش رنگ ہے

مثل بلبل زمزموں کا خود یہاں اک رنگ ہے

ارغنوں اس انجمن میں خارج از آہنگ ہے

ہر خیال اپنا ہے یاں اک مطرب شیریں نوا

ہر نفس سینہ میں اک موج صدائے چنگ ہے

عکس تیرا پڑ کے اس میں ہو گیا پاکیزہ تر

اے بت کافر مری آنکھوں میں فیض گنگ ہے

لوح دل ہر جنبش مژگاں سے ہے معنی پذیر

ہر رگ اندیشہ نقش خامۂ ارژنگ ہے

نظم اکبرؔ سے بلاغت سیکھ لیں ارباب عشق

اصطلاحات جنوں میں بے بہا فرہنگ ہے

— اکبر الہ آبادی