مکمل شاعری
روشن دل عارف سے فزوں ہے بدن ان کا
رنگیں ہے طبیعت کی طرح پیرہن ان کا
ہے صاف نگاہوں سے عیاں جوش جوانی
آنکھوں سے سنبھلتا نہیں مستانہ پن ان کا
ہر بات میں وہ چال کیا کرتے ہیں مجھ سے
الفت نہ نبھے گی جو یہی ہے چلن ان کا
جن لوگوں نے دل میں ترے گھر اپنا کیا ہے
باہر ہے دو عالم سے مری جاں وطن ان کا
یہ شرم کے معنی ہیں حیا کہتے ہیں اس کو
آغوش تصور میں نہ آیا بدن ان کا
اس زلف و رخ و لب پہ انہیں کیوں نہ ہو نخوت
تاتار ہے ان کا حلب ان کا یمن ان کا
غیروں نے کبھی پاک نظر سے نہیں دیکھا
وہ اس کو نہ سمجھیں تو یہ ہے حسن ظن ان کا
آیا جو نظر حسن خداداد کا جلوہ
بت بن گیا منہ دیکھ کے ہر برہمن ان کا
مرقد میں اتارا ہمیں تیوری کو چڑھا کر
ہم مر بھی گئے پر نہ چھٹا بانکپن ان کا
اللہ رے فریب نظر چشم فسوں ساز
بندہ ہے ہر اک شیخ ہر اک برہمن ان کا
غیروں ہی پہ چلتا ہے جو اب ناز کا خنجر
کیوں بیچ میں لایا تھا مجھے بانکپن ان کا
دلچسپ ہی آفت ہے قیامت ہے غضب ہے
بات ان کی ادا ان کی قد ان کا چلن ان کا
گزری ہوئی باتیں نہ مجھے یاد دلاؤ
اب ذکر ہی جانے دو تم اے جان من ان کا
محروم ہی رہ جاتی ہے آغوش تمنا
شرم آ کے چرا لیتی ہے سارا بدن ان کا
عارض سے غرض ہم کو عنادل کو ہے گل سے
ہے کوچۂ معشوق ہمارا چمن ان کا