مکمل شاعری

جلوہ عیاں ہے قدرت پروردگار کا

کیا دل کشا یہ سین ہے فصل بہار کا

موج ہوا و زمزمۂ عندلیب مست

اک ساز دلنواز ہے مضراب و تار کا

نازاں ہیں جوش حسن پہ گل ہائے دل فریب

جوبن دکھا رہا ہے یہ عالم ابھار کا

ہیں دیدنی بنفشہ و سنبل کے پیچ و تاب

نقشہ کھینچا ہوا ہے خط و زلف یار کا

سبزہ ہے یا یہ آب زمرد کی موج ہے

شبنم ہے بحر یا گہر آبدار کا

پرواز میں ہیں تیتریاں شاد و چست و مست

زیب بدن کیے ہوئے خلعت بہار کا

مرغان باغ زمزمہ سنجی میں محو ہیں

اور ناچ ہو رہا ہے نسیم بہار کا

ابر تنک نے رونق موسم بڑھائی ہے

غازہ بنا ہے روئے عروس بہار کا

افسوس اس سماں میں بھی اکبرؔ اداس ہے

سوہان روح ہجر ہے اک گل عذار کا

— اکبر الہ آبادی