مکمل شاعری

دشت غربت ہے علالت بھی ہے تنہائی بھی

اور ان سب پہ فزوں بادیہ پیمائی بھی

نگہ شوق و تمنا کی وہ دل کش تھی کمند

جس سے ہو جاتے تھے رام آہوئے صحرائی بھی

ہم صنم خانہ جہاں کرتے تھے اپنا قائم

پھر کھڑے ہوتے تھے واں حور کے شیدائی بھی

خواب راحت ہے کہاں نیند بھی آتی نہیں اب

بس اچٹ جانے کو آئی جو کبھی آئی بھی

اب نہ وہ عمر نہ وہ لوگ نہ وہ لیل و نہار

بجھ گئی طبع کبھی جوش پہ گر آئی بھی

اب تو شبہے بھی مجھے دیو نظر آتے ہیں

اس زمانہ میں پری زاد تھی رسوائی بھی

یاد ہے مجھ کو وہ بے فکری و آغاز شباب

سخن آرائی بھی تھی انجمن آرائی بھی

کام کی بات جو کہنی ہو وہ کہہ لو اکبرؔ

دم میں چھن جائے گی یہ طاقت گویائی بھی

— اکبر الہ آبادی