مکمل شاعری

مطلق نہیں محال عجب موت دہر میں

مجھ کو تو یہ حیات ہی حیرت کی بات ہے

راضی تو ہو گئے ہیں وہ تاثیر عشق سے

موقع نکالنا سو یہ حکمت کی بات ہے

میرے حواس عشق میں کیا کم ہیں منتشر

مجنوں کا نام ہو گیا قسمت کی بات ہے

دل جس کے ہاتھ میں ہو نہ ہو اس پہ دسترس

بے شک یہ اہل دل پہ مصیبت کی بات ہے

ترچھی نظر سے آپ مجھے دیکھتے ہیں کیوں

دل کو یہ چھیڑنا ہی شرارت کی بات ہے

پروانہ رینگتا رہے اور شمع جل بجھے

اس سے زیادہ کون سی ذلت کی بات ہے

— اکبر الہ آبادی