مکمل شاعری

کچھ آج علاج دل بیمار تو کر لیں

اے جان جہاں آؤ ذرا پیار تو کر لیں

سو جان سے ہو جاؤں گا راضی میں سزا پر

پہلے وہ مجھے اپنا گنہ گار تو کر لیں

سمجھے ہوئے ہیں کام نکلتا ہے جنوں سے

کچھ تجربہ سبحہ و زنار تو کر لیں

منظور وہ کیوں کرنے لگے دعوت اکبرؔ

خیر اس سے ہے کیا بحث ہم اصرار تو کر لیں

حج سے ہمیں انکار نہیں حضرت واعظ

طوف حرم کوچۂ دلدار تو کر لیں

منہ ہم کو لگاتا ہی نہیں وہ بت کافر

کہتا ہے یہ اللہ سے انکار تو کر لیں

— اکبر الہ آبادی