مکمل شاعری

دلوں سے آرزوئے عمر جاوداں نہ گئی

کوئی نگاہ پس گرد کارواں نہ گئی

نکل کے خلد سے بھی آدمی نہ پچھتایا

زمیں پہ بھی چمن آرائی گماں نہ گئی

وہ اور چیز ہے ہوتے ہیں جس سے دل شاداب

تری بہار سے ویرانیٔ خزاں نہ گئی

دیار عشق کھنڈر اور دشت دل سنسان

مگر ندیمؔ کی رنگینی بیاں نہ گئی

بس ایک کنج قفس تک نہ آ سکی ورنہ

صبا چلی تو چمن میں کہاں کہاں نہ گئی

کہاں کہاں نہ ہوئیں ثبت حسن کی مہریں

کلی ہوا میں بکھر کر بھی رائیگاں نہ گئی

مری دعا کی یہ غیرت ہے کتنی قابل داد

کہ لب تک آئی مگر سوئے آسماں نہ گئی

— احمد ندیم قاسمی