مکمل شاعری

شعور میں کبھی احساس میں بساؤں اسے

مگر میں چار طرف بے حجاب پاؤں اسے

ندیمؔ ترک محبت کو ایک عمر ہوئی

میں اب بھی سوچ رہا ہوں کہ بھول جاؤں اسے

اندھیری رات میں جب راستہ نہیں ملتا

میں سوچتا ہوں کہاں جا کے ڈھونڈ لاؤں اسے

اگرچہ فرط حیا سے نظر نہ آؤں اسے

وہ روٹھ جائے تو سو طرح سے مناؤں اسے

ابھی تک اس کا تصور تو میرے بس میں ہے

وہ دوست ہے تو خدا کس لیے بناؤں اسے

اسے بلا کے ملا عمر بھر کا سناٹا

مگر یہ شوق کہ اک بار پھر بلاؤں اسے

طویل ہجر کا یہ جبر ہے کہ سوچتا ہوں

جو دل میں بستا ہے اب ہاتھ بھی لگاؤں اسے

— احمد ندیم قاسمی