مکمل شاعری
سورج نے گھنے صنوبروں میں
جالے سے شعاعوں کے بنے ہیں
ہم عکس ہیں ایک دوسرے کا
چہرے یہ نہیں ہیں آئنے ہیں
لمحوں کا غبار چھا رہا ہے
یادوں کے چراغ جل رہے ہیں
سقراط نے زہر پی لیا تھا
ہم نے جینے کے دکھ سہے ہیں
کچھ اتنی شدید تیرگی ہے
آنکھوں میں ستارے تیرتے ہیں
پا کر بھی تو نیند اڑ گئی تھی
کھو کر بھی تو رت جگے ملے ہیں
یکساں ہیں فراق و وصل دونوں
یہ مرحلے ایک سے کڑے ہیں
ہم تجھ سے بگڑ کے جب بھی اٹھے
پھر تیرے حضور آ گئے ہیں
جب تیرا جمال ڈھونڈتے تھے
اب تیرا خیال ڈھونڈتے ہیں
احساس میں پھول کھل رہے ہیں
پت جھڑ کے عجیب سلسلے ہیں
دیکھیں تو ہوا جمی ہوئی ہے
سوچیں تو درخت جھومتے ہیں
ہم زندہ ہیں اے فراق کی رات
پیاری ترے بال کیوں کھلے ہیں
ہم دل کے گداز سے ہیں مجبور
جب خوش بھی ہوئے تو روئے ہیں
جو دن تری یاد میں کٹے تھے
ماضی کے کھنڈر بنے کھڑے ہیں
— احمد ندیم قاسمی