مکمل شاعری

یہ دشت ترک محبت یہ تیرے قرب کی پیاس

جو اذن ہو تو تری یاد سے گزر جاؤں

ترے جمال کا پرتو ہے سب حسینوں پر

کہاں کہاں تجھے ڈھونڈوں کدھر کدھر جاؤں

مرا وجود مری روح کو پکارتا ہے

تری طرف بھی چلوں تو ٹھہر ٹھہر جاؤں

مروں تو میں کسی چہرے میں رنگ بھر جاؤں

ندیمؔ کاش یہی ایک کام کر جاؤں

یہ جی میں آتی ہے تخلیق فن کے لمحوں میں

کہ خون بن کے رگ سنگ میں اتر جاؤں

یہ سوچتا ہوں کہ میں بت پرست کیوں نہ ہوا

تجھے قریب جو پاؤں تو خود سے ڈر جاؤں

کسی چمن میں بس اس خوف سے گزر نہ ہوا

کسی کلی پہ نہ بھولے سے پاؤں دھر جاؤں

ترے سوا کوئی شائستۂ وفا بھی تو ہو

میں تیرے در سے جو اٹھوں تو کس کے گھر جاؤں

میں زندہ تھا کہ ترا انتظار ختم نہ ہو

جو تو ملا ہے تو اب سوچتا ہوں مر جاؤں

— احمد ندیم قاسمی