مکمل شاعری
جستجو بھی مرا فن ہے مرے بچھڑے ہوئے دوست
جو بھی در بند ملا اس پہ صدا دے دوں گا
تو کرم کر نہیں سکتا تو ستم توڑ کے دیکھ
میں ترے ظلم کو بھی حسن ادا دے دوں گا
اک محبت کے عوض ارض و سما دے دوں گا
تجھ سے کافر کو تو میں اپنا خدا دے دوں گا
جب بھی آئیں مرے ہاتھوں میں رتوں کی باگیں
برف کو دھوپ تو صحرا کو گھٹا دے دوں گا
رخ بدل دوں گا صبا کا ترے کوچے کی طرف
اور طوفان کو اپنا ہی پتا دے دوں گا
ایک پل بھی ترے پہلو میں جو مل جائے تو میں
اپنے اشکوں سے اسے آب بقا دے دوں گا
ختم گر ہو نہ سکی عذر تراشی تیری
اک صدی تک تجھے جینے کی دعا دے دوں گا
— احمد ندیم قاسمی