مکمل شاعری

پہرے بیٹھے ہیں قفس پر کہ ہے صیاد کو وہم

پر شکستوں کو بھی اک ربط ہے پرواز کے ساتھ

جب تک ارزاں ہے زمانے میں کبوتر کا لہو

ظلم ہے ربط رکھوں گر کسی شہباز کے ساتھ

عمر بھر سنگ زنی کرتے رہے اہل وطن

یہ الگ بات کہ دفنائیں گے اعزاز کے ساتھ

ایک بار اور بھی کیوں عرض تمنا نہ کروں

کہ تو انکار بھی کرتا ہے عجب ناز کے ساتھ

تو بگڑتا بھی ہے خاص اپنے ہی انداز کے ساتھ

پھول کھلتے ہیں ترے شعلۂ آواز کے ساتھ

پست اتنی تو نہ تھی میری شکست اے یارو

پر سمیٹے ہیں مگر حسرت پرواز کے ساتھ

لے جو ٹوٹی تو صدا آئی شکست دل کی

رگ جاں کا کوئی رشتہ ہے رگ ساز کے ساتھ

تو پکارے تو چمک اٹھتی ہیں میری آنکھیں

تیری صورت بھی ہے شامل تری آواز کے ساتھ

— احمد ندیم قاسمی