مکمل شاعری

تیری محفل بھی مداوا نہیں تنہائی کا

کتنا چرچا تھا تری انجمن آرائی کا

افق ذہن پہ چمکا ترا پیمان وصال

چاند نکلا ہے مرے عالم تنہائی کا

داغ دل نقش ہے اک لالۂ صحرائی کا

یہ اثاثہ ہے مری بادیہ پیمائی کا

بھری دنیا میں فقط مجھ سے نگاہیں نہ چرا

عشق پر بس نہ چلے گا تری دانائی کا

وہ ترے جسم کی قوسیں ہوں کہ محراب حرم

ہر حقیقت میں ملا خم تری انگڑائی کا

نالہ آتا ہے جو لب پر تو غزل بنتا ہے

میرے فن پر بھی ہے پرتو تری رعنائی کا

ہر نئی بزم تری یاد کا ماحول بنی

میں نے یہ رنگ بھی دیکھا تری یکتائی کا

جب بھی دیکھا ہے تجھے عالم نو دیکھا ہے

مرحلہ طے نہ ہوا تیری شناسائی کا

— احمد ندیم قاسمی