مکمل شاعری

عجب سرور ملا ہے مجھے دعا کر کے

کہ مسکرایا خدا بھی ستارہ وا کر کے

گدا گری بھی اک اسلوب فن ہے جب میں نے

اسی کو مانگ لیا اس سے التجا کر کے

شب فراق کے ہر جبر کو شکست ہوئی

کہ میں نے صبح تو کر لی خدا خدا کر کے

خود اپنی ذات پہ تو اعتماد پختہ ہوا

ندیمؔ یوں تو مجھے کیا ملا وفا کر کے

یہ چارہ گر ہیں کہ اک اجتماع بد ذوقاں

وہ مجھ کو دیکھیں تری ذات سے جدا کر کے

یہ سوچ کر کہ کبھی تو جواب آئے گا

میں اس کے در پہ کھڑا رہ گیا صدا کر کے

خدا بھی ان کو نہ بخشے تو لطف آ جائے

جو اپنے آپ سے شرمندہ ہوں خطا کر کے

— احمد ندیم قاسمی