مکمل شاعری
ہر لمحہ اگر گریز پا ہے
تو کیوں مرے دل میں بس گیا ہے
میں تیرے کہے سے چپ ہوں لیکن
چپ بھی تو بیان مدعا ہے
ہر دیس کی اپنی اپنی بولی
صحرا کا سکوت بھی صدا ہے
چلمن میں گلاب سنبھل رہا ہے
یہ تو ہے کہ شوخی صبا ہے
ماضی کی سناؤں کیا کہانی
لمحہ لمحہ گزر گیا ہے
اک عمر کے بعد مسکرا کر
تو نے تو مجھے رلا دیا ہے
اس وقت کا حساب کیا دوں
جو تیرے بغیر کٹ گیا ہے
جھکتی نظریں بتا رہی ہیں
میرے لیے تو بھی سوچتا ہے
مت مانگ دعائیں جب محبت
تیرا میرا معاملہ ہے
— احمد ندیم قاسمی