مکمل شاعری

سر بازار ہے یاروں کی تلاش

جو گزرتا ہے خفا لگتا ہے

موسم گل میں سر شاخ گلاب

شعلہ بھڑکے تو بجا لگتا ہے

کوہ غم پر سے جو دیکھوں تو مجھے

دشت آغوش فنا لگتا ہے

سانس لینا بھی سزا لگتا ہے

اب تو مرنا بھی روا لگتا ہے

اتنا مانوس ہوں سناٹے سے

کوئی بولے تو برا لگتا ہے

اس قدر تند ہے رفتار حیات

وقت بھی رشتہ بپا لگتا ہے

مسکراتا ہے جو اس عالم میں

بہ خدا مجھ کو خدا لگتا ہے

نطق کا ساتھ نہیں دیتا ذہن

شکر کرتا ہوں گلہ لگتا ہے

ان سے مل کر بھی نہ کافور ہوا

درد یہ سب سے جدا لگتا ہے

— احمد ندیم قاسمی