مکمل شاعری

عشق ہے نام انتہاؤں کا

اس سمندر میں اعتدال کہاں

دل بدن کا شریک حال کہاں

ہجر پھر ہجر ہے وصال کہاں

دل کہ خوش فہم تھا سو ہے ورنہ

تیرے ملنے کا احتمال کہاں

ایسا نشہ تو زہر میں بھی نہ تھا

اے غم دل تری مثال کہاں

ہم کو بھی اپنی پائمالی کا

ہے مگر اس قدر ملال کہاں

تجھ پہ لکھی تو سج گئی ہے غزل

آ ملا خواب سے خیال کہاں

وصل و ہجراں ہیں اور دنیائیں

ان زمانوں میں ماہ و سال کہاں

اب تو شہہ مات ہو رہی ہے فرازؔ

اب بچاؤ کی کوئی چال کہاں

تجھ کو دیکھا تو لوگ حیراں ہیں

آ گیا شہر میں غزال کہاں

میں نئی دوستی کے موڑ پہ تھا

آ گیا ہے ترا خیال کہاں

— احمد فراز