مکمل شاعری

فقیہ شہر کی مجلس سے کچھ بھلا نہ ہوا

کہ اس سے مل کے مزاج اور کافرانہ ہوا

ہجوم ایسا کہ راہیں نظر نہیں آتیں

نصیب ایسا کہ اب تک تو قافلہ نہ ہوا

وہ رات بھول چکو وہ سخن نہ دہراؤ

وہ رات خواب ہوئی وہ سخن فسانہ ہوا

ابھی ابھی وہ ملا تھا ہزار باتیں کیں

ابھی ابھی وہ گیا ہے مگر زمانہ ہوا

کچھ اب کے ایسے کڑے تھے فراق کے موسم

تری ہی بات نہیں میں بھی کیا سے کیا نہ ہوا

شہید شب فقط احمد فرازؔ ہی تو نہیں

کہ جو چراغ بکف تھا وہی نشانہ ہوا

— احمد فراز