مکمل شاعری

میں بھی ایسا کہاں کا زود شناس

وہ بھی لگتا ہے سوچتی ہے ابھی

دل کی وارفتگی ہے اپنی جگہ

پھر بھی کچھ احتیاط سی ہے ابھی

میں بھی شہر وفا میں نو وارد

وہ بھی رک رک کے چل رہی ہے ابھی

اول اول کی دوستی ہے ابھی

اک غزل ہے کہ ہو رہی ہے ابھی

گرچہ پہلا سا اجتناب نہیں

پھر بھی کم کم سپردگی ہے ابھی

خود کلامی میں کب یہ نشہ تھا

جس طرح روبرو کوئی ہے ابھی

فصل گل میں بہار پہلا گلاب

کس کی زلفوں میں ٹانکتی ہے ابھی

کیسا موسم ہے کچھ نہیں کھلتا

بوندا باندی بھی دھوپ بھی ہے ابھی

قربتیں لاکھ خوبصورت ہوں

دوریوں میں بھی دل کشی ہے ابھی

مدتیں ہو گئیں فرازؔ مگر

وہ جو دیوانگی کہ تھی ہے ابھی

— احمد فراز