مکمل شاعری

جس سمت بھی دیکھوں نظر آتا ہے کہ تم ہو

اے جان جہاں یہ کوئی تم سا ہے کہ تم ہو

یہ خواب ہے خوشبو ہے کہ جھونکا ہے کہ پل ہے

یہ دھند ہے بادل ہے کہ سایا ہے کہ تم ہو

یہ عمر گریزاں کہیں ٹھہرے تو یہ جانوں

ہر سانس میں مجھ کو یہی لگتا ہے کہ تم ہو

دیکھو یہ کسی اور کی آنکھیں ہیں کہ میری

دیکھوں یہ کسی اور کا چہرہ ہے کہ تم ہو

اس دید کی ساعت میں کئی رنگ ہیں لرزاں

میں ہوں کہ کوئی اور ہے دنیا ہے کہ تم ہو

ہر بزم میں موضوع سخن دل زدگاں کا

اب کون ہے شیریں ہے کہ لیلیٰ ہے کہ تم ہو

اک درد کا پھیلا ہوا صحرا ہے کہ میں ہوں

اک موج میں آیا ہوا دریا ہے کہ تم ہو

وہ وقت نہ آئے کہ دل زار بھی سوچے

اس شہر میں تنہا کوئی ہم سا ہے کہ تم ہو

اے جان فرازؔ اتنی بھی توفیق کسے تھی

ہم کو غم ہستی بھی گوارا ہے کہ تم ہو

آباد ہم آشفتہ سروں سے نہیں مقتل

یہ رسم ابھی شہر میں زندہ ہے کہ تم ہو

— احمد فراز