مکمل شاعری
اک فنا کے گھاٹ اترا ایک پاگل ہو گیا
یعنی منصوبہ زمانے کا مکمل ہو گیا
ذہن پر بے سمتیوں کی بارشیں اتنی ہوئیں
یہ علاقہ تو گھنے رستوں کا جنگل ہو گیا
جسم کے برفاب میں آنکھیں چمکتی ہیں ابھی
کون کہتا ہے کہ اس کا حوصلہ شل ہو گیا
اس کلید اسم نا معلوم سے کیسے کھلے
دل کا دروازہ کہ اندر سے مقفل ہو گیا
شعلہ زار گل سے گزرے تو سر آغاز ہی
اک شرر آنکھوں سے اترا خون میں حل ہو گیا
شہر آیندہ کا دریا ہے گرفت ریگ میں
بس کہ جو ہونا ہے اس کا فیصلہ کل ہو گیا
موسم تاخیر گل آتا ہے کس کے نام پر
کون ہے جس کا لہو اس خاک میں حل ہو گیا
اس قدر خوابوں کو مسلا پائے آہن پوش نے
شوق کا آئین بالآخر معطل ہو گیا
— آفتاب اقبال شمیم