مکمل شاعری

جب چاہا خود کو شاد یا ناشاد کر لیا

اپنے لئے فریب سا ایجاد کر لیا

خود سے چھپا کے خود کو زمانے کے خوف سے

ہم نے تو اپنے آپ کو برباد کر لیا

یوں بھی پناہ‌ سایہ کڑی دھوپ میں ملی

آنکھیں جھکائیں اور تجھے یاد کر لیا

آیا نیا شعور نئی الجھنوں کے ساتھ

سمجھے تھے ہم کہ ذہن کو آزاد کر لیا

بس کہ امام عصر کا فرمان تھا یہی

منہ ہم نے سوئے قبلۂ اضداد کر لیا

تھا عشق کا حوالہ نیا ہم نے اس لئے

مضمون دل کو پھر سے طبع زاد کر لیا

کیا سوچنا کہ شوق کا انجام کیا ہوا

جب اختیار پیشۂ فرہاد کر لیا

— آفتاب اقبال شمیم